ادلة تورط مبارك فى مذبحة غزة

مع انى قرفت من الكتابة بسبب اللى بيحصل بس امرى لله هاكتب تانى ورزقى على الله
قريت على موقع مصراوى تعليق مواطن محترم يثبت ادانه مبارك افندى فى مذبحة غزة قولت انقلكم ألأدلة المحترمه اللى الراجل اثبتها مع انى والله لو ما جاب اى دليل انا مؤمن يقينا انه اللفندى بتاعنا خاين لمصر وخاين لدين ربنا الله يخرب بيته
وهذا نص الادلة من موقع مصراوى

ادلة تورط النظام المصرى ومبارك فى مذبحة غزة

1-منع القوافل الطبية والغذائية من دخول غزة لمدة عامين

2- تصريحات مسئولى النظام المتتالية بعدم السماح باقامة امارة اسلامية على حدود مصر

3- تصريح النظام بعداوته لحماس والقبض على الكثير من قادتها داخل سجون مصر

4-اعلان ليفنى بضرب غزة وابادتها اثناء زيارتها لمصر ومن قلب القاهرة وبجوارها ابو الغيط وعدم رده على ذلك

5- تصريحات ابو الغيط بان حماس هى المخطئة وعليها ان تتحمل نتيجة اعمالها

6- رفض مصر لاقامة القمة العربية التى دعا اليها امير قطر وبشار الاسد

7-دعم مصر القوى لابو مازن ودحلان رغم وضوح سقوطهم فى العمالة لاسرائيل

8- الحملات الاعلامية الموجهة بان حماس عميلة لايران وتحويل العدو عند المصريين من اسرائيل الى ايران

9- اعتقال المئات من المتعاطفين مع اهل غزة وخاصة الاسلاميين

10- حشد القوات المصرية بالداخل وعلى الحدود بالداخل لاعتقال المتعاطفين وعلى الحدود لاعتقال الفارين من المذبحة

11-منع الاطباء الاتراك واليونانيين والمصريين من العبور لغزة مع شدة احتياج الجرحى والمصابين بالالاف لهم

12- منع دخول المساعدات العاجلة والتحجج تارة بضيق المعبر وتارة بالتخوفات الامنية

13- تصريحات الوفد الاوربى بتاكيد مبارك لهم على وجوب هزيمة حماس

14-تصريحات ساركوزى بان مبارك قال بعدم خروج حماس منتصرة ابدا

15-رفض مبارك لقاء وفد علماء المسلمين الذين يلتقون بجميع الحكام العرب والمسلمين لدعوتهم لنصرة غزة

16- اصدار مبارك لمبادرة تهدف لتكريس الوضع وبقاء القوات على ما هى عليه وعدم دعوة اسرائيل للانسحاب وفك الحصار

17-شكر بوش واولمرت لمبارك بالوقوف الى جانبهم ودعم مواقفهم

18- اجماع الشعوب فى العالم اجمع على وجود تواطؤ واضح من مبارك عبد الله ابو مازن والقوى الصهيونية ومجلس الامن والاتحاد الاوروبى

هندى بيعمل واجب مع النظام المصرى

الحقيقة وعند تصفحى لموقع مصراوى لمع خبر قدام عينى اثار حفيظتى جريت على الخبر طبعا مش قناعة بمضمون الخبر ولا تصديقا للخبر وأنما قراءة لتعليقات القراء التى اعشقها وادمنها وبالفعل كان هناك عدة ملاحظات على الخبر هاقولها بعد ما اقولكو عنوان الخبر واللى كان بيقول

رئيس وزاء الهند : مصر في عهد مبارك..إحدى أكبر الدول المؤثرة في العالم

وكان أول تعليق وقعت عليه عينى هو من مواطن مصرى مية فى المية والدليل خفة دم صاحبه اللى مالهاش حل وبيقول

ايه الصورة دي

الراجل الهندي دة شكلوا فاهم

شكلك فاهم يا نصة

انا طبعا جريت اشوف رئيس الوزراء الهندى وشكله والفيل اللى جاى عليه يعنى أجمع شويه معلومات عن الخبر

تبين لي بداية انه فعلا هندى . مش بس كده لا. ده هندى هندى .يعنى هندى باب وشباك هندى أبا عن جد بدليل الكلام اللى هو قاله اللى ما يصدقوش غير هندى زيه

ولاحظت حاجه تانيه تموت من الضح وهى صورة الريس الله يمسيه بالخير

الصوره ديه حسستنى ان الريس لسه غاسل راسه ومسرح شعره تقريبا نيو لوك

بس زى ما تقول اللوك جنح شمال شويه ودخل على محمود الحدينى الله يمسيه بالخير

المهم انه خبر لا هايقدم ولا هاياخر ده مجرد مجامله بين الساسه وبعض.

احنا اللى ربنا كرمنا به من الخبر والصوره اننا ضحكنا شويه

مانموهان سينج

توجيهات الرئيس

إستمرار المساعدات المصرية لاثيوبيا بتوجيهات من الرئيس مبارك
عجبتنى أوى كلمة توجيهات السيد الرئيس ديه بصراحه كان من فترة حوالى خمس او ست سنين كنت كل ما افتح الاخبار أو اسمع اى مسئول أو اقرأ جريده الاقى حاجه غريب وهى توجيهات السيد الرئيس الحقيقه كانت توجيهات فى كل حاجه . فى رصف الطرق وفى عمل المستشفيات وفى فوزنا بأى بطوله وفى كل اللى تتخيله واللى ما تتخيلوش .
كانت توجيهات السيد الرئيس زى بسم الله الرحمن الرحيم
ومن توجيهات السيد الرئيس أننا نستمر فى المساعدات لاثيوبيا
اثيوبيا ديه يا أهل الخير معظمها يهود أو قولو ان اليهود مسيطرين عليها سيطره كامله
واثيوبيا ديه هى اللى قتلت المسلمين فى الصومال واحتلت بلادهم بالسلاح الامريكى الاسرائيلى
واثيوبيا بردو اللى كان فيها محاوله إغتيال الرئيس
طيب الرئيس مصر على استمرار المساعدات ليه ؟؟؟؟ الله أعلم بس طبعا ومما لا شك فيه ان كلام الرئيس فيه حكمه بالغه

من وجهة نظرى أنه ممكن يكون قرار زى ده فعلا حكيم ويفيد مصلحة البلد ومدروس ووراه ابعاد احنا مش
عارفنها بس بردو قرار زى ده وبهذه الحكمه يجعلنا نتعجب ونسأل أين الرئيس وتوجيهاته مما يحدث فى مصر؟ مصر بتتقسم على فئه من المنتفعين من قيادات الجيش وعصابات الحزب الوطنى والخراب والفساد لركب الركب والعلاقات الخارجيه مع الأخوة العرب زى الزفت والحمد لله وحالة الشعب زفتين اقتصاديا ونفسيا وديوقراطيا وعلاقة اسرائيليه حميمه وفوق الممتازه . طيب فهمونا مين معانا ومين علينا ؟ ولا عرفونا احنا فين ؟ ولا إحنا مين ؟
ويعودها عليكم الأيام بخير

دعوة لمقاطعة ساويرس

الموضوع باختصار
ساويرس وفضيحة التعامل مع الكيان الصهيونى فى الفترة الأخيرة
ساويرس يعلن الحرب على الحجاب ويتعجب من ظاهرة كثرة المحجبات فى مصر
ساويرس يعلن عن بث قناة فضائية تعرض الافلام بدون قطع المشاهد الإباحية نوع من أنواع حرية التعبير والتضليل ونشر العلمانية على حد قوله
طيب ليه يا جماعة الخير ما نقاطعش اللفندى ده وإن كنت أرجع أقول أن العيب مش عليه العيب على النظام المحترم اللى سمح لامثال الاستاذ باللغوصه فى مصارين البلد
كان نفسى اسمع الباشمهندس طنطاوى مفتى الديار ووجهة نظره فى اللى بيعمله الاستاذ وهل ما يقوم به حلالون أم حرامون
ولا هى حلوه لساويرس وعز وطلعت مصطفى وحرام على ايمن نور وابراهيم عيسى وغيره وغيره وغيره

مقتل وفاء قسطنطين

اعلن الدكتور زغلول النجار عن وفاة السيدة / وفاء قسطنطين فى دير وادى النطرون وهى التى اعتصم شنوده لمده ثلاثة ايام لاستلامها من المسلمين وقد سلمها النظام لشنوده وزبانيته فى وادى النطرون حتى يجعلوها عبرة لكل من تسول له نفسه ان يؤمن بالله وما كان من نظام مبارك إلا أن قال انا لا اسمع لا أرى لا أتكلم أنها إرادة اسيادنا وحسبنا الله ونعم الوكيل فى شنوده وفى مبارك

بالنسبه لشيخ الازهر ( وبالمناسبة انا أزهرى حتى النخاع ) .ـ

زى ما اتعودت معاكو على الاختصار فى الكلام هاحكى حكاية صغيره خالص وباختصار
الحلقة الأولى
فى عهد الرئيس عبد الناصر عليه من الله ما يستحق كان احد الأئمة يخطب الجمعة فى وجود السيد الرئيس وكان الكلام ده تقريبا فى مسجد السيده زينب وكان هذا الشيخ من الاسماء اللامعة المهم صاحبنا اثناء الخطبة أخذته الجلاله فأخد يمدح فى الرئيس جمال وقال فى مدحه " يا من اكرمت الأعمى وقد عاتب الله نبيه فقال عبس وتولى أن جائه الأعمى " يقصد أن الرئيس جمال احسن التصرف مع الأعمى فكان افضل من رسول الله فى التعامل مع الأعمى وكان جمال قام بتكريم طه حسين الله المهم قام شاب بعد الصلاه وقال ايها الناس إن الامام قد كفر ولا تجوز خلفة الصلاه وسنعيد الصلاه وفعلا أعاد الشاب الصلاه وتبعه أخرون .
الحلقة التانيه
راوى هذه القصة من الرجال الثقات كبير السن كان قد شهد الجمعة التى حدثت فيها الواقعة يقول راوى القصه " بعد أن مرت السنين ومات عبد الناصر وغير عبد الناصر اقسم بالله انى رأيت هذا الشيخ يتكفف الناس (يعنى بيشحت )أمام مسجد السيدة زينب . أنتهى كلام الراوى )
الشاهد من القصة
أن من يفترى على الله الكذب مثل هذا الشيخ وكثير غيره لا يموت حتى يكون عبره لم يعتبر ويلقى من المهانه لما يتوقعه أحد والأمثله للظالمين كثيرة ولا داعى لذكر الاسماء.
طيب انا مصدع دماغكو ليه بالكلام ده ؟
هاقولكو ليه
لانه فى الايام القليلة الماضية خرج علينا الشيخ طنطاوى شيخ الازهر بفتوى عجيبه يطالب فيها بجلد الصحفيين وهى فتوى مجامله لحبيبه مبارك على حساب الازهر وعلى حساب كرامه البشر وعلى حساب تاريخ مصر . من الاخر ماعملش حساب لا لدين ولا لغير دين كل ما كان فى باله هو مرضاة رب نعمته حتى ولو كان فى سخط الله . طيب هل تتوقعو لشيخ الازهر أن يصبح هذا حاله ويصبح مضحكه لكل صغير وكبير وعلى كل لسان (طبعا ده وضع مؤسف صنعه مبارك بنفسه لضمان الا يتدخل الازهر باى صوره فى قراراته )لذا وضع هذا الشخص فى هذا المكان ووسد الأمر إلى غير أهله لذا فانتظر يا طنطاوى العقاب سيطالب الصالح والطالح بعزلك وسيضحك عليك القريب والغريب وستكون حكاية على كل لسان وانتظر المزيد.
وحسبنا الله ونعم الوكيل فى من ولى طنطاوى هذه المكانه

عاجبنى أوى الحرب الوطنى

بأمانة عجبنى النظام المصرى أوى وبالذات الحزب الوطنى

من يومين سمعت كلمة من احد رجال الحزب الوطنى السيد / محمد عبداللاة اللى سقط فى الانتخابات الاخيرة بيقول ايه بقى بسلامته

ان الحزب الوطنى فى تقدم وبيتغير عن قبل كده .

لا والنبى . يعنى انت شايف اننا نستنى التغيرات اللى بتحصل فى الحزب الوطنى كأن الحزب الوطنى اتفرض علينا فى المدرسة ولا نازل معانا واحنا فى اللفة وملزمين بالصبر عليه واى معارض يلقى مصير ايمن نور , وايمن اسماعيل .

ملاحظ فى الفترة الاخيرة خيبة امل فى الحزب وفى النظام وافلاس مالوش مثيل والدليل الجرايم اللى عمالين يعملوها مع الشعب

اعتقال الاخوان وتعذيبهم وارهاب الطلاب وقتل السياسين وعمل مكائد للمعارضين والضرب بكلام المصلحين المحايدين عرض الحائط امثال الاستاذ هويدى والاستاذ عمارة وغيرهم ده بالنسبه للفساد السياسى .

ناهيك عن الفساد الاقتصادى وده مش محتاج تعليق

ده غير التعليم والصحة والمواصلات وسعر البشر وسعر الارض وقيمة الانسان

لا والله انا رأى ندى فرصه تانيه للحزب الوطنى ونسيب له البلد ليه لوحده هو والعملاء الخونه بتوعه عشان يبقى اخد فرصته . مش احسن كده؟ اعتقد كده هايرتاحو من اشكالنا اللى تعر . ويفضل فى البلد النظاف بتوع الحزب الوطنى وربنا يخلي لهم جمال وسوزان وبابا حسنى

وعمو فاروق بردو حسنى . وعمو يوسف والى وصفوت بيه الشريف وكمال بيه الشاذلى اللى فعلا خلو بلدنا فى احسن صوره وفى احسن حال ولعلمك الناس ديه ماتقبلش الرشوه ولا تسيب فرض من فروض ربنا ولاتقبل بالحرام ولا بالغش ولابالتزوير .

ويعوض علينا ربنا

شعب غريب

عندنا كم صبر مالوش مثيل أم الخير حالها فى النازل بقالها سنين فقر وجوع وسرقه ونهب واعتقالات وتوريث وسمعا وطاعة للامريكان واليهود و ..... و.... ولسه صابرين يابوووووووووووووووووووووووووووووى

مهازل بعلم رجال الداخلية

باختصار وعشان ما اطولش عليكم انا مصرى شغال بدوله الكويت نزلت مصر اجازه طبعا كنت نسيت اللى بيحصل فى مصر نظرا لانى شوفت التعامل المحترم فى الكويت كل حاجه بالكمبيوتر والبطاقات الزكيه ومن غير تعب وقلة أدب .
فى البداية نزلت فى مطار القاهرة المنظر لوحده عيب على سمعة مصر . وبعدين امين شرطه مالوش لزمه اخد الجواز عشان اخرج من المطار وركنه جنبه مش عشان حاجه وجيه راجل محترم بعدى راح نفس الأمين (أمين الشرطه) راكن جواز الراجل جنبه شويه وراح ناده عليه قولت له افندم قال خد .روحت اخد الجواز وماشى وبعدين نده على الراجل المحترم وعمل نفس الكلام . الشاهد من الكلام انه مافيش اجراء معين مطلوب مننا ولا من سيادة الامين الا انه مريض نفسيا وكان بيطلع عقدة النقص بتعته علينا .
دخلنا مصر وقضيت الاجازه وحبيت اسافر قولت ارجع برى (يعنى بالسيارة) مع صديق حميم روحت القنصلية السعوديه بالسويس عشان اخد تأشيرة مرور وهناك موجود موظف الله لا يبارك له فى صحته ولا فى عافيته قول آمين . بكل غباء قالى عاوز تروح فين قولتله بكل ادب حضرتك انا شغال فى الكويت ومافيش حجز طيران الوقتى ممكن تاشيرة مرور . بكل غباء وقله ادب قالى روح احجز تذكره وتعالى (على العبارة) قولتله سيدتك التاشيرة بتكون بفترة يعنى مش بيوم يعنى ممكن تدينى تاشيرة لمده اسبوعين وانا اسافر فى اى يوم فى الاسبوعين . عمل مهم واتعصب وقالى ديه تعليمات طيب فى حد نقابله طبعا ممنوع يعم الله يهديك ممنوع (فكرنى بالعسكرى فى فيلم هانى رمزى لما هانى بيقوله انا العريس وديه العروسه عدينا بقى والعسكرى يقوله ممنوع ) المهم سافرنا على القاهرة نحجز عشان مافيش فى السويس
المهم حجزنا التذاكر وبالمره روحنا القنصلية السعوديه نتاكد من الشرط المعجز بتاع موظف القنصلية السعوديه بالسويس لقينا طابور طووووووووووووووووووووييل والناس جاية من الساعة 6 الصبح المهم مافيش قرار بيقول اننا لازم نكون حاجزين تذكره ولا على اللائحه المعروضه ولا من حد من ذوى الخبرة بالمكان
المهم بعد رحله فى القاهرة رجعنا السويس بعد يومين كنا حجزنا التذاكر اول ما دخلنا رد علينا نفس الموظف المجرم الحيوان الله لا يبارك له فى صحته ولا فى عافيته وقال بكل غباء انتو جيتو ازاى قولت له احنا جينا طيران قال اللى جاى طيران يرجع طيران (يا حلاوه بالسمسم والجبنه الرومى ) يعنى ايه ياعم انا اتجننت وزعقت عامل حسابى بقى لو حد تجاوز الحدود هاتصل بكل الوسائل المرئيه والمسموعة .
المهم قولتله يا عم افرض انا جيت طيران وعاوز ارجع بجمل ولاماشى ولا بأتوبيس ولا باى وسيله انا بس عاوز تاشيرة مرور قالى ديه تعليمات ( الكذاب ) والله العظيم ديه ماتعليمات وده اللى اكتشفناه فى القاهرة . المهم رجالة الامن قالولى معلش ديه تعليمات والناس اللى جت قبلك رجعت بردو مشيت وانا هايطير برج من دماغى
لانى عندى شغل فى الكويت يعنى ولا احنا عارفين نعيش فى مصر ولا عارفين نغور منها المهم رجعنا القاهرة تانى
لقينا الأتى
طابور طووووووووووووووووووووووووويل وفى شويه سرسريه (بلطجية ) موجودين بالمكان وبحكم انى مفتح قريت كده من شكلهم انه بيخلصو فى الموضوع روحت لواحد منهم وقولت له ما تعرفش حد يخلص لنا التاشيرة ديه قالى هات 120 جنيه وانا ادخلك فى الصف طبعا ده بعلم مسئولين فى السفارة وهاقولك الدليل بس اصبر عليه .
المهم روحت مغامر وقايل لصحبى ندفع لواحد مننا بس قالى ماشى راح صحبى دافع ووقف فى الصف . الغريب ان الناس كانهم اموات سلبيه عجيبه ولاحد قاله انت رايح فين ياعم ولا الدموع . قبل ما يدخل صحبى فى الصف البلطجى قال لنا مليت الاستمارة قلنا لا قال املى استمارة وتعالى روحنا لقينا واحد ساند على عربيه ومعاه نموذج بيكتب لك عليه أسمك وشويه بيانات هبله وياخد منك عشره جنيه وبعدين مفهمين الناس ان الاستمارة لازم منها . بكام يا عم الاستماره 10 جنيه ( واتارى الاستماره بتتوزع مجانا داخل القنصلية ) ولكن نظرا لان اللعب على كبير سيبهم يمصو دم الغلابه بالنصب وعلى عينك ياتجر الشرطه فى كل مكان جردن ستى بقى وما ادراك ما جردن ستى .
بعد ما ملينا الاستماره قالو انت سجلت اسمك على الكمبيوتر قولنا لا قالك روح سجل بردو على حسابك الشخصى وده بزنس جديد
اتارى يا خويا فى مركز اسمه مركز فهد فيه اربع شباب قاعدين على كمبيوترات ومدارين الشاشات يعنى ما تشوفش الموقع ولاتشوف غير ظهر الشاشه المهم تدفع عشره جنيه وتقعد تستنى اسمك كانه شغل بجد وهى كلها هبل فى هبل ده غير قلة أدب اللفندى اللى بينادى على الاسماء بسلامته ما بيحبش حد يكون واقف قدامه يعنى لازم تروح تقعد على الكرسى عشان يسجل اسمك وإلا هايتنرفز عليك ويوقف الدنيا
وكأن ده عمل حكومى ولا كانه امين شرطه . وسر المهنه مش موجود غير عند مركز فهد المهم انا زهقت من السفالة ديه واخدت القرار انى هاسفر بالطيارة حتى لو اتاخرت وحتى لو فصلونى من الشغل طيب هاعمل؟ ايه فى ايه فى ايدى اعمله .
وفعلا روحت حجزت طيران يوم 1/9/2007 وكده طبعا انا متاخر جدا بس ربنا سترها المهم روحت ارجع التذكره بتاعت المركب اتخصم منى 15% من قيمه التذكره مش مشكله .
كل ده على أن الرحله هاتكون من القاهرة للاقصر (نوصل الاقصر الساعة 6) ثم من الاقصر الساعة 11 الى الكويت نوصل 1 باليل
فى مطار الاقصر الشكل جميل والمنظر مبدع المهم انا معايا كرتونتين منجو (كانت المنجه خضرا يعنى عشان تستوى بعد اربع ايام )
لقيت شويه نصبين اتلمو عليه وعلى كل اللى يدخل عاوزين ايه ؟ لازم تغلف قولت ماشى كويس ده نظام محترم عشان ساعات بيكون فى كراتين فيها حاجه تدلق ولا حاجه ما نبوظش الطياره . واللى سكتنى ان العيال ديه معلقين كارنيهات عليها كلمة وزراة الداخلية قولت يعنى تبعنا بكام يعم الكرتونه قالى ب20 جنيه يعنى انا مطلوب منى 40 جنيه . انا اتجننت مش عشان الفلوس والله انا اصلا معايا فلوس مصرى مش محتاجها كنت اخدها للامان ومجرد ما خرجت ملهاش قيمه يعنى 100 جنيه ب 5 دينار المهم انا حسيت انها قله ادب واستغلال للمكان بصوره تعكنن بلاستك ما يكلفش 1 جنيه يديهولى ب 40 طيب ليه يعنى ماهو كده نصب وانا ازعل أوى لما يتنصب عليها .روحت مزعق مين هنا اكلمه لقيت اللفنديه شاورو على واحد منهم المهم يمين شمال غلفولى الكرتونتين مع بعض ب30 جنيه وانا زى الباشا والله ينور عليكى يا مصر روحت اوزن موظف الميزان الحمار لقى معايا كيسه صغيره قالى ديه تتغلف طبعا انتو عارفين التغليف يعنى 20 جنيه وحرقه دم لانه استكراد واستعباط قولتله فى ايه يا عم ( وطبعا هو صاحب القرار مافيش قانون ولا فى حد يساله ) قاله الكيس ديه يتغلف قولتله ديه منجا خضرا وده كيس صغير وانا مغلفها بسلوتب عريض يعنى استحاله يقع منها حاجه وهى كلها بتاع 2 كيلو . عمل زى اللفندى اياه وقالى ممنوع قولتله( الله يخرب بيت امك ) فى سرى طبعا وروحت مديله الفكه اللى معايا راح اتخرص فى لسانه اديتو الفلوس على الملئ وقدام الناس كلها عشان حد يقبض عليه ولا يقبض عليه انا . بس مين مافيش فايده عشان حد يشوفنا كله اتعمى قولت خلاص بقى بدل ما اغلف بعشرين جنيه كيس ثمنه 8 جنيه . يعنى التغليف اغلى من الكيس باللى فيه . وفى نفس المطار كان بيمر واحد افندى تبع المطار وطبعا احنا كنا فى الاقصر يعنى الصعايده الغلابه اللى عاوزين يكلو عيش. بسلامته عمال يلف على الناس ويقول لده انت تغلف الشنطه ديه يقوله ليه ديه شنطه يقوله معلش بس فيها قطع . المسكين صاحب الشنطه يقوله بس ديه فيها هدوم يقوله لازم تتغلف . واحد تانى جاى مش معاه شنط وفى واحد معاه كرتونه زياده عن الوزن راح قايله خلى ديه معاك عليها اسمى وبياناتى بس عديهالى معاك عشان الوزن المهم صاحبنا المفترى شافه راح مزعقله قدام الناس واخد الكرتوته من الاستاذ اللى معهوش حاجه ومديها لصاحبها تانى يا عم طيب وانت مال امك المهم لازم ندفع فلوس وخلاص ساعتين ووصلنا الحمد لله بسلام للكويت بس عشان ما كونش ظالم اشكر الظابط المسئول عن مراجعه ورق السفر هو تقريبا برتبة عقيد لانه محترم جدا
واشكر قائد طائرة مصر للطيران المقلعه من الاقصر الساعة 11 مساء يوم السبت 1/9/2007 لانه ماشاء الله عليه برنس طيار زى ما الكتاب بيقول نزل بينا على الارض نزول مزيكا غير انه اثناء وجودنا فى الجو كان بردو مزيكا وهما دول بس اللى كان فيهم الخير من كل الرحله .

ولا جابت جاز ولا خربت

فى ناس عندها دم

وناس فى العذاب والهم

وناس فكرة الدنيا ليها لوحدها

والبلطجه على أدها

وناس بتعجن الدستور

ولو كان القرار من مبتور

ومافيش ضمير فى القول

وعموما

بكره الفضيحة تذلهم

وتطلع ميتين اهلهم

ونفرح فيهم كلهم

اللى مافيش عندهم

دم

اخوكم درش والارزاق على الله